Tbilisi, 12 dekabr, AZƏRTAC

Gürcüstanın Batumi şəhərində Azərbaycan xalqının Ulu Öndəri Heydər Əliyevə həsr olunmuş və ölkəmizin Gürcüstandakı səfirliyinin dəstəyi ilə çəkilmiş “Dostluğun siması” adlı sənədli filmin təqdimatı olub.

AZƏRTAC xəbər verir ki, film fenomen şəxsiyyət, dünyaşöhrətli siyasi xadim Heydər Əliyevin həyat və fəaliyyətindən bəhs edir.

Tədbirdə Azərbaycanın Batumi şəhərindəki Baş konsulu Pərviz İsmayılzadə, Acarıstan Muxtar Respublikasının kənd təsərrüfatı naziri Zaza Şavadze, Türkiyənin Batumidəki baş konsulu Rıza Kağan Yılmaz, muxtar respublikanın dövlət və hökumət üzvləri, deputatlar, SOCAR-ın əməkdaşları, yerli siyasətçilər və ictimai xadimlər iştirak ediblər.

Əvvəlcə Azərbaycan və Gürcüstanın Dövlət himnləri səsləndirilib, Ulu Öndərin əziz xatirəsi bir dəqiqəlik sükutla yad edilib.

Təqdimat mərasimində Azərbaycanın Batumi şəhərindəki baş konsulu Pərviz İsmayılzadə çıxış edərək Ümummilli Lider Heydər Əliyevin həyat və fəaliyyəti barədə ətraflı məlumat verib. Bildirib ki, vəfatının 20-ci ildönümündə xatirəsini dərin hörmətlə andığımız Heydər Əliyev adını xalqımızın şanlı tarixinə qızıl hərflərlə yazdırıb. Məhz Ulu Öndərin təməlini qoyduğu sülh strategiyası, səmimi və mehriban qonşuluq, qarşılıqlı faydalı və strateji tərəfdaşlıq, dostluq siyasəti bu gün onun göstərdiyi yolun layiqli davamçısı Prezident İlham Əliyev tərəfindən uğurla davam etdirilir.

Diplomat Azərbaycan-Gürcüstan münasibətlərinin inkişafına da nəzər salıb, ölkələrimiz arasında əlaqələrin strateji tərəfdaşlıq səviyyəsinə yüksəldiyini xüsusi qeyd edib.

Acarıstan Muxtar Respublikasının kənd təsərrüfatı naziri Zaza Şavadze çıxışında ölkələrimiz arasındakı mehriban qonşuluq və dostluq münasibətlərindən, eləcə də gürcü xalqının Ulu Öndərə olan sevgisindən bəhs edib. Bildirib ki, münasibətlərimizin strateji tərəfdaşlıq səviyyəsinə yüksəlməsində tarixi şəxsiyyət Heydər Əliyevin adı ilə bağlıdır. Heydər Əliyev XX əsrin görkəmli liderlərindən biri idi. Onun həyatı bir daha sübut edir ki, Heydər Əliyev ölkənin tarixində və inkişafında böyük əhəmiyyət kəsb edib. Ölkəyə ağır vaxtlarında başcılıq edərək ona yenidən sülh, iqtisadi və siyasi müstəqilliyi qazandırıb. Hazırda Azərbaycan bütün sahələrdə sürətlə inkişaf edən müasir ölkəyə çevrilib, eyni zamanda da öz çox əsrli ənənələrini qoruyub saxlayıb.

Filmin ssenari müəllifi və ideya müəllifi Şahismayıl Şəmmədoğlu bildirib ki, bu günədək Azərbaycan-Gürcüstan münasibətlərinə dair bir neçə ekran əsəri çəkilib: “Lakin bu film ölkələrimiz arasındakı əlaqələrin inkişafında və münasibətlərin möhkəmlənməsində xüsusi rolu olan fenomen şəxsiyyət Heydər Əliyevin fəaliyyətindən bəhs edən sanballı sənət əsəridir. Filmin ərsəyə gəlməsində göstərdikləri dəstəyə və yardıma görə, ölkəmizin Gürcüstandakı səfirliyinə və digər şəxslərə minnətdarlığını bildirirəm".

Ekran əsərində Azərbaycanın və Gürcüstanın dövlət və hökumət rəsmilərinin, azərbaycanlı və gürcü siyasətçilərin, elm və ictimaiyyət xadimlərinin Ulu Öndərlə, onun müəllifi olduğu layihələr və ideyalarla bağlı fikirləri əksini tapıb.

Türkiyənin baş konsulu Rıza Kağan Yılmaz, tarixçi alim Ramiz Bəkirov, filmin quruluşçu rejissoru və operatoru Elnur Vəlizadə çıxış edərək Ulu Öndər barədə fikirlərini bölüşüblər.

Qeyd edək ki, filmin redaktoru AZƏRTAC-ın Gürcüstan üzrə xüsusi müxbiri Xətayi Əzizovdur.